बॅनर न्यूज
भोसरी मतदारसंघाच्या राजकीय पटावर गोंधळात गोंधळ; अजित पवार गट सोडून शरद पवार गटात गेलेले तोंडावर आपटले
पिंपरी : पिंपरी-चिंचवडमधील राष्ट्रवादी काँग्रेस अजित पवार गटातील काही माजी नगरसेवकांनी बुधवारी शरद पवार गटात प्रवेश केला. हा प्रवेश भोसरीचे माजी आमदार विलास लांडे यांच्या मार्गदर्शनानुसार झाल्याचे अजित पवार गटाचे शहराध्यक्ष अजित गव्हाणे यांनी सांगितले होते. मात्र दुसऱ्याच दिवशी विलास लांडे हे अजित पवार गटासोबतच असल्याचे स्पष्ट झाले. त्यामुळे शरद पवार गटात प्रवेश केलेले अजित पवार गटातील सर्व माजी नगरसेवक अक्षरशः तोंडावर आपटले आहेत. अजित गव्हाणे यांना भोसरी विधानसभा मतदारसंघातून आमदारकी लढवायची आहे. पण अजित गव्हाणे यांच्यात ती क्षमता नसल्याचे आता स्पष्टपणे दिसू लागले आहे. शिवसेना उद्धव ठाकरे गटाचाही अजित गव्हाणे यांच्या नावाला उघडपणे विरोध होत आहे. खुद्द खासदार अमोल कोल्हे यांना देखील अजित गव्हाणे नको आहेत, अशी कुजबूज भोसरी मतदारसंघात आहे. त्यामुळे भोसरी मतदारसंघाच्या राजकीय पटावर गोंधळात गोंधळ सुरू असून, त्याला पुढे जाऊन काय राजकीय वळण मिळते याकडे सर्वांचे लक्ष लागले आहे.
गेल्या काही दिवसांपासून पिंपरी-चिंचवडमधील भोसरी विधानसभा मतदारसंघात वेगवान राजकीय घडामोडी घडत आहेत. मात्र या घडामोडी मतदारसंघातील नागरिकांना बुचकळ्यात टाकणारी ठरत आहेत. विशेषतः राष्ट्रवादी काँग्रेस अजित पवार गटातील आऊटगोईंग आणि शरद पवार गटातील इनकमिंगमुळे भोसरी मतदारसंघात पुढे काय राजकीय गणिते तयार होणार आहेत, याचा कोणालाच अंदाज बांधता येणार नाही अशी परिस्थिती निर्माण झाली आहे. आषाढी एकादशीच्या दिवशी बुधवारी राष्ट्रवादी अजित पवार गटाचे शहराध्यक्ष अजित गव्हाणे यांच्यासह काही माजी नगरसेवकांनी शरद पवार गटात प्रवेश केला. माजी नगरसेवकांचा आकडा फुगवून सांगण्यात आला. त्यामुळे या प्रवेशाची चर्चा राज्यभर झाली.
पिंपरी-चिंचवडमध्ये अजित पवार गटाला जोरदार धक्का असेच या प्रवेशाचे सगळीकडे वर्णन केले गेले. मात्र अजित पवार गटाला हा धक्का देणारा नव्हता, तर महाविकास आघाडीत गोंधळात गोंधळ वाढविणारा हा पक्ष प्रवेश होता हे लगेच दुसऱ्याच दिवशी स्पष्ट झाले आहे. अजित पवार गटाचे शहराध्यक्ष अजित गव्हाणे यांनी काही माजी नगरसेवकांसह शरद पवार गटात प्रवेश केल्यानंतर भोसरीचे माजी आमदार विलास लांडे यांच्या मार्गदर्शनानुसार आपण हा निर्णय घेतल्याचे सांगितले होते. मात्र दुसऱ्याच दिवशी विलास लांडे हे अजित पवार यांच्यासोबत बैठकीला उपस्थित होते. पिंपरी-चिंचवडमधील अजित पवार गटाचे पदाधिकारी व कार्यकर्ते तसेच आमदार अण्णा बनसोडे हे या बैठकीत होते. त्यामुळे अजित पवार गटातून शरद पवार गटात प्रवेश केलेले अजित गव्हाणे यांच्यासह माजी नगरसेवक अक्षरशः तोंडावर आपटले आहेत. गेल्या दोन दिवसांत घडलेल्या या राजकीय घडामोडीमुळे भोसरी मतदारसंघात गोंधळात गोंधळ अशी स्थिती निर्माण झालेली आहे.
आमदारकीचे परफेक्ट मटेरियल नसलेले अजित गव्हाणे
अजित पवार गट सोडून शरद पवार गटात प्रवेश केलेले अजित गव्हाणे हे भोसरी विधानसभा मतदारसंघात लढण्यासाठी इच्छुक आहेत. मात्र त्यांच्यासोबत फिरणारे दोन-चार माजी नगरसेवक वगळता इतरांकडून त्यांना प्रतिसाद मिळत नसल्याचे राजकीय वास्तव आहे. विशेषतः दुसऱ्या आणि तिसऱ्या फळीतील कार्यकर्त्यांना अजित गव्हाणे हे आमदारकीचे परफेक्ट मटेरियल वाटत नसल्याचे चित्र आहे. त्याला अजित गव्हाणे यांचाही कारभार कारणीभूत आहे. भोसरी विधानसभा मतदारसंघात भ्रष्टाचाराने कळस गाठलेला असताना अजित गव्हाणे यांनी कधीच कोणता भ्रष्टाचार उघड करण्याचे काम केले नाही. माध्यमांपुढे आले की भाजपने खूप भ्रष्टाचार केला अशी तोंडाची वाफ दवडण्यापलीकडे त्यांनी काहीही केलेले नाही. ते स्वतः स्थायी समिती सभापती होते. मात्र एकदाही त्यांना कागदावर भ्रष्टाचार उघड करता आलेला नाही. त्यामुळे अजित गव्हाणे यांची भाजपसोबत “अंडरस्टॅडींग” असल्याचे अजित पवार गटात आणि शरद पवार गटात उघडपणे बोलले जाते. राष्ट्रवादी काँग्रेसचे शहराध्यक्ष म्हणून त्यांना त्यांची ही प्रतिमा बदलण्याची संधी होती. मात्र दरबारी राजकारणा पलीकडे अजित गव्हाणे यांना आपली प्रतिमा बदलता आली नाही, त्याचा फटका आता त्यांना बसत असल्याचे चित्र आहे.
बंटी, बबली सल्लागार आणि खासदार अमोल कोल्हे यांचाही विरोध
पिंपरी-चिंचवडच्या राजकारणात प्रशासनासोबत राजकीय व्यक्तींना ब्लॅकमेलिंग करणारी एक जोडगोळी आहे. या जोडगोळीला बंटी आणि बबली म्हणून शहराच्या राजकारणात ओळखले जाते. या बंटी आणि बबलीचे अनेक राजकीय पक्ष फिरून झाले आहेत. या जोडगोळीला आता कोणत्याच राजकीय पक्षात थारा उरलेला नाही. हे ज्या राजकीय पक्षात किंवा राजकीय व्यक्तीसोबत त्यांचे राजकीय वाटोळे हे गणित ठरलेले आहे. त्यांचा हा पायगुणच असल्याचे राजकीय वर्तुळात आता उघडपणे बोलले जाते. अशी ही कुप्रसिद्ध बंटी आणि बबली अजित पवार गट सोडून शरद पवार गटात प्रवेश केलेले अजित गव्हाणे यांचे सध्याचे सल्लागार असल्याची चर्चा शहराच्या राजकीय वर्तुळात आहे. त्यामुळे सुद्धा अजित गव्हाणे यांची भोसरी मतदारसंघात नकारात्मक प्रतिमा तयार झालेली दिसत आहे.
त्याचप्रमाणे शिरूर लोकसभा मतदारसंघाचे शरद पवार गटाचे खासदार अमोल कोल्हे यांनाही अजित गव्हाणे नको, असल्याची चर्चा आहे. तसेच शिवसेना उद्धव ठाकरे गटाने सुद्धा अजित गव्हाणे यांच्या नावाला उघडपणे विरोध सुरू केला आहे. भोसरी मतदारसंघात घडणाऱ्या या सगळ्या राजकीय घडामोडी गोंधळात गोंधळ वाढविणाऱ्या ठरत आहेत. प्रत्यक्ष विधानसबा निवडणुकीचा रणसंग्राम सुरू होईल तेव्हा महाविकास आघाडीत कालचा गोंधळ बरा होता अशी म्हणण्याची वेळ येते की, सर्वमान्य उमेदवार देऊन मजबुतीने निवडणुकीला सामोरे जातात हे पाहणे महत्त्वाचे ठरणार आहे.
