प्रभाग क्रमांक १५, आकुर्डी गावठाण-निगडी प्राधिकरणमध्ये राष्ट्रवादी काँग्रेसच्या प्रचाराची भव्य सांगता 

पिंपरी : प्रभाग क्रमांक १५, आकुर्डी गावठाण-गंगागनर-वाहतूकनगरी-निगडी प्राधिकरणमध्ये राष्ट्रवादी काँग्रेसचे उमेदवार धनंजय कोळभोर यांच्यासह इतर तीनही उमेदवारांच्या निवडणूक प्रचाराची मंगळवारी उत्साहपूर्ण आणि शक्तीप्रदर्शनात सांगता झाली. राष्ट्रवादी काँग्रेसकडून संपूर्ण प्रभागात काढण्यात आलेल्या भव्य पदयात्रेने नागरिकांचे लक्ष वेधून घेतले, तर कार्यकर्त्यांनी काढलेल्या भव्य दुचाकी रॅलीमुळे घड्याळाचा गजर सर्वत्र ऐकू येत होता.

प्रभागातील प्रमुख रस्ते, वस्ती आणि चौकांमधून गेलेल्या या पदयात्रेत कार्यकर्त्यांचा मोठा सहभाग, नागरिकांचा उत्स्फूर्त प्रतिसाद आणि विजयाचा आत्मविश्वास हे चित्र स्पष्टपणे पाहायला मिळाले. “घड्याळाचा गजर, विकासाचा निश्चय”, “धनंजय कोळभोर आगे बढो” अशा घोषणांनी संपूर्ण परिसर दुमदुमून गेला. दुचाकी रॅलीत शेकडो कार्यकर्ते सहभागी झाले होते. घड्याळाच्या चिन्हाचे झेंडे, बॅनर आणि घोषणांनी प्रभागात निवडणुकीचा रंग चढला होता.

पदयात्रेदरम्यान धनंजय कोळभोर यांनी नागरिकांशी थेट संवाद साधत, “हा प्रचार जनतेच्या विश्वासाचा आहे. प्रभाग १५ मधील विकास, मूलभूत सुविधा आणि नागरिकांच्या प्रश्नांना प्राधान्य देऊन काम करण्याची माझी ठाम भूमिका आहे,” असे सांगितले.

संपूर्ण प्रचार काळात  घराघरांत संपर्क, प्रश्नांवर स्पष्ट भूमिका, कार्यकर्त्यांची मजबूत फळी यामुळे धनंजय कोळभोर यांना प्रभागात सकारात्मक वातावरण निर्माण करण्यात यश आले आहे, अशी भावना कार्यकर्ते आणि नागरिक व्यक्त करत आहेत. मंगळवारी प्रचाराची सांगता झाली असली, तरी घड्याळाचा गजर, कार्यकर्त्यांचा उत्साह आणि जनतेचा प्रतिसाद पाहता प्रभाग क्रमांक १५ मध्ये राष्ट्रवादी काँग्रेसच्या घड्याळाला भक्कम पाठिंबा मिळत असल्याचे चित्र स्पष्टपणे दिसून येत आहे. आता केवळ मतदानाचा दिवस बाकी असून, गुरूवारी मतदानादिवशी प्रभाग १५ मध्ये घड्याळाचा गजर मतपेटीत उमटणार, असा विश्वास कार्यकर्ते व्यक्त करत आहेत.