मोशीतील छत्रपती संभाजी महाराज पुतळा प्रकरण; भाजप आमदार महेश लांडगे यांच्या खासगी पीएची पत्रकारांना धमकी

पिंपरी-चिंचवड महापालिकेच्या वतीने मोशी, बाऱ्हाडेवाडी येथील विनायकनगर येथे छत्रपती संभाजी महाराज यांचा पुतळा उभारण्यात येणार आहे. या पुतळ्यासाठी सुरूवातीला सुमारे ५ ते ६ कोटी रुपये खर्च करून चौथरा उभारण्यात आला. नंतर आणखी कोट्यवधी रुपये खाण्यासाठी पुतळ्याची जागा बदलण्यात आली. आता मोशी सेक्टर क्रमांक ५ व ८ येथील पीएमआरडीएच्या पुणे आंतरराष्ट्रीय प्रदर्शन आणि कन्व्हेन्शन केंद्राच्या जागेत १०० फूट उंचीचा पुतळा उभारण्यासाठी साडेबारा कोटी रुपयांचा चौथरा बांधण्यात येत आहे. १०० फुटी पुतळा उभारण्यात येत असल्याचे सांगत शहरात मोठा गवगवा करण्यात आला. हे करत असताना आधीचे काम आणि नंतरचे काम एकाच ठेकेदाराला देण्यात आले. या पुतळ्यासाठी पिंपरी-चिंचवडकरांनी घाम गाळून कमाविलेले ६० कोटींहून अधिक रुपये खर्च केले जाणार असल्याचे सांगण्यात येत आहे. मात्र भोसरी विधानसभा मतदारसंघाचा खरा कारभार पाहिला, तर हा खर्च १०० कोटींपेक्षा जास्त होईल, असे महापालिकेचे अधिकारी खासगीत बोलताना सांगत आहेत.

कोट्यवधींचा खर्च केला जात असताना छत्रपती संभाजी महाराज यांच्या पुतळ्याचे वेगवेगळे भाग मोशीतील महापालिकेच्या अत्यंत गलिच्छ जागेत ठेवण्यात आल्याचे समोर आले आहे. तसेच पुतळ्याच्या मोजडीला तडे गेल्याचेही फोटो ३० ऑगस्ट २०२४ रोजी सोशल मीडियावर व्हायरल झाले. हे फोटो व्हायरल झाल्यानंतर शहरातील काही पत्रकारांनी त्याची बातमी करून सोशल मीडियावर टाकली. या बातम्या व्हायरल झाल्यानंतर भोसरीचे भाजप आमदार महेश लांडगे यांचे पीए आणि महापालिकेचे ठेकेदार असलेले प्रसाद कुलकर्णी यांनी पत्रकारांना धमकी वजा फोन करून दबाव आणण्याचा प्रयत्न केला. तुम्ही कशी काय बातमी केली?, बातमी चुकीची असून, ती काढून टाका, असे म्हणत दबाव निर्माण केला.

हा ठेकेदार एवढ्यावरच थांबला नाही, तर संभाजी महाराजांच्या पुतळ्याच्या मोजडीला तडे गेल्याच्या बातमीचे डिझाईन बनवून काही पत्रकार फेक नरेटिव्ह पसरवीत असल्याचा उल्लेख करीत ते सोशल मीडियावर व्हायरल करून पत्रकारांचीच बदनामी करण्याचा जाणीवपूर्वक प्रयत्न केला. त्यानंतर भोसरी एमआयडीसी पोलीस ठाण्यातून एका पोलीसाने पत्रकाराला फोन करून बातमी का दिली म्हणून विचारणा केली. तसेच आता पोलीस पुतळ्याच्या जागेवर जाऊन पंचनामा करणार असून, खोट्या बातम्या लिहिणाऱ्या पत्रकारांवर गुन्हे दाखल करण्यात येणार असल्याची धमकी दिली. या सर्व प्रकारानंतर शहरातील पत्रकार भितीच्या छायेखाली वावरत असल्याचे चित्र आहे. याप्रकरणी राष्ट्रवादी काँग्रेस शरद पवार पक्षाचे शहराध्यक्ष तुषार कामठे यांनी पोलीस आयुक्तांना लेखी पत्र देऊन छत्रपती संभाजी महाराज यांच्या पुतळ्याच्या निकृष्ट दर्जाचे काम पत्रकारांनी बातम्यांमधून उघड केले. त्यानंतर भाजपचे कार्यकर्ते व ठेकेदार यांच्याकडून संबंधित पत्रकारांना धमकी वजा फोन करण्यात आले आहेत. ही बाब गंभीर असून, या प्रकरणाची चौकशी करून पत्रकारांना धमकावणाऱ्यांवर कारवाई करावी, अशी मागणी कामठे यांनी पोलीस आयुक्तांकडे केली आहे.