भोसरी मतदारसंघात आव्वाज कुणाचा; पिंपरी-चिंचवडमध्ये १० वर्षानंतर शिवसेनेचा आमदार होणार?

पिंपरी-चिंचवड महापालिकेवर बिनविरोध निवडून आलेले माजी नगरसेवक रवि लांडगे भोसरी मतदारसंघात शिवसेना उद्धव ठाकरे गटाचा चेहरा बनले आहेत. मतदारसंघातील सर्वसामान्यांमध्ये असलेली चांगली प्रतिमा, सर्वांच्या मदतीला धावून जाण्याचा स्वभाव, प्रत्येक गोष्टींचा इव्हेंट व दिखाऊपणा किंवा भपकेबाजीपणा न करता प्रत्यक्ष लोकांमध्ये मिसळून काम करण्याची प्रवृत्ती, विरोधकांविषयी कपट भावना न ठेवता जनतेच्या कामांना प्राधान्य देण्याची वृत्ती यामुळे रवि लांडगे हे जनतेचा उमेदवार म्हणून पुढे आले आहेत. मतदारसंघातील सर्वसामान्य जनतेच्या तोंडी फक्त रवि लांडगे यांचेच नाव येत असल्याचे पाहायला मिळत आहे. त्यामुळे निवडणूक जाहीर होण्यापूर्वीच भोसरी मतदारसंघात रवि लांडगे यांचा विजय निश्चित असल्याचा आवाज मतदारसंघातील जनतेतून येत असल्याचे चित्र आहे. फक्त ते किती फरकाने निवडून येतात याचीच उत्सुकता मतदारसंघातील जनतेमध्ये दिसत आहे. रवि लांडगे उमेदवार म्हणजे विजय पक्का असे राजकीय समीकरण भोसरी मतदारसंघात तयार झाले आहे. रवि लांडगे यांच्यासमोर भाजपचे आमदार महेश लांडगे यांचा निभाव लागणार नाही असेच राजकीय चित्र आहे. त्यामुळे भोसरी मतदारसंघात महाविकास आघाडीचे उमेदवार रवि लांडगे हे फिक्स असल्याचे सूत्रांनी सांगितले.

शिरूर मतदारसंघात २०१९ आणि २०२४ च्या लोकसभा निवडणुकीतील पराभवाचा अपवाद वगळता पिंपरी-चिंचवडमध्ये शिवसेनेने लोकसभा निवडणुकीत कधी पराभव पाहिलेला नाही. पिंपरी-चिंचवड शहरात शिवसेनेची एक पक्की आणि कट्टर व्होट बँक आहे. त्यामुळे कधीकाळी सलग दोनवेळा आमदार, आधीचा खेड आणि नंतरच्या शिरूर लोकसभा मतदारसंघात सातत्याने तीन वेळा आणि मावळ मतदारसंघात सुद्धा सातत्याने तीनवेळा विजय मिळालेल्या शिवसेनेला येत्या विधानसभा निवडणुकीसाठी महाविकास आघाडीच्या जागा वाटपात पिंपरी-चिंचवडमध्ये एक मतदारसंघ द्यावाच लागेल असे चित्र आहे. महाविकास आघाडीच्या जागा वाटपात ज्या राजकीय पक्षाची हमखास निवडून येण्याची क्षमता त्या पक्षाला ती जागा सोडण्याचे सूत्र ठरले आहे. त्यानुसार पिंपरी-चिंचवडमधील तीन मतदारसंघांपैकी भोसरी मतदारसंघात रवि लांडगे हे हमखास निवडून येतील असेच राजकीय वातावरण आहे. त्यामुळे महाविकास आघाडीत भोसरी मतदारसंघ हा शिवसेना उद्धव ठाकरे गट लढविणार असल्याचे जवळपास निश्चित झाले आहे. आता जागा वाटपाची घोषणा कधी होते याकडे सर्वांचे लक्ष लागले आहे.