बॅनर न्यूज
खंडेवस्ती झोपडपट्टीच्या पुनर्वसनासाठी बोगस सर्वेक्षण; भिंतीला शटर लावून दाखवले दुकान
पिंपरी : भोसरीतील खंडेवस्ती झोपडपट्टीचे पुनर्वसन करण्यासाठी झोपडीधारकांचे आणि दुकान गाळ्यांचे बोगस सर्वेक्षण सुरू असल्याचा धक्कादायक प्रकार समोर आला आहे. भिंतीला दुकानाचे शटर लावून दुकान असल्याची नोंद सर्वेक्षणात केली जात आहे. त्यामुळे हे बोगस सर्वेक्षण करणाऱ्या बिल्डरवर आणि त्याला मूकसंमती असणाऱ्या एसआरएच्या संबंधित अधिकारी व कर्मचाऱ्यांवर फौजदारी कारवाई करण्यात यावी, अशी मागणी पिंपरी-चिंचवड शहर वंचित बहुजन आघाडीचे उपाध्यक्ष महेंद्र सरवदे यांनी केली आहे.
यासंदर्भात महेंद्र सरवदे यांनी प्रसिद्धीस दिलेल्या पत्रकात म्हटले आहे, “भोसरी येथील खंडेवस्ती झोपडपट्टीचे एसआरए अंतर्गत पुनर्वसन करण्याच्या हालचाली सुरू आहेत. त्यासाठी काही बिल्डरांनी एसआरएच्या अधिकाऱ्यांना हाताशी धरून बालाजीनगर झोपडपट्टीचे सर्वेक्षण सुरू केले आहे. या सर्वेक्षणांतर्गत खेडवस्ती झोपडपट्टीत किती झोपडीधारक आहेत, झोपड्यांची संख्या, दुकानांची संख्या याची मोजदाद केली जात आहे. मात्र हे सर्वेक्षण बोगस पद्धतीने केले जात आहे. दुकाने नसताना अनेक ठिकाणी दुकाने असल्याची नोंद केली जात आहे. त्यासाठी सर्वेक्षण करणाऱ्या बिल्डराच्या कर्मचाऱ्यांनी चक्क भिंतीला शटर लावून, त्याचे फोटो काढत दुकान असल्याची नोंद सर्वेक्षणात करण्याचा सपाटा लावला आहे. बिल्डराकडून सुरू असलेल्या या बोगस सर्वेक्षणाला झोपडपट्टी पुनर्वसन प्राधिकरणातील अधिकाऱ्यांची मूक संमती आहे. या बोगस सर्वेक्षणात अधिकाऱ्यांचेही हात ओले होत आहेत.
बिल्डरांनी या झोपडपट्टी पुनर्वसन योजनेतून मिळणारा टीडीआर आणि एफएसआयच्या हव्यासापायी एसआरएच्या अधिकाऱ्यांना चिरीमिरी देऊन खंडेवस्ती झोपडपट्टीचे बोगस सर्वेक्षणाच्या आधारे पुनर्वसनाचा घाट घातला आहे. बोगस सर्वेक्षण करणारा संबंधित बिल्डर, त्याचे कर्मचारी आणि अशा सर्वेक्षणाला मूक संमती देणारे एसआरएचे अधिकारी यांच्यावर फौजदारी कारवाई व्हावी, अशी मागणी त्यांनी केली आहे.”
