आधी चिंचवड पोटनिवडणूक आता मावळ लोकसभा; पिंपरी-चिंचवडमध्ये शंकर जगताप यांचाच डंका

पिंपरी : मावळ लोकसभा मतदारसंघात महायुतीचे उमेदवार श्रीरंग बारणे यांचा तिसऱ्यांदा झालेला विजय हा शंभर टक्के भाजपचा विजय मानला जात आहे. मावळ मतदारसंघात समावेश असलेल्या पिंपरी-चिंचवडमध्ये भाजपचे शहराध्यक्ष शंकर जगताप यांनी निवडणुकीत केलेले काम बारणे यांच्या विजयासाठी लाख मोलाचे ठरले आहे. त्यामुळे शंकर जगताप हे मावळच्या विजयाचे खरे “किंगमेकर” ठरले आहेत. शंकर जगताप यांनी चिंचवड विधानसभा मतदारसंघात झालेल्या पोटनिवडणुकीत आणि आता लोकसभा निवडणुकीत स्वतःच्या संघटन शक्तीची आणि राजकीय परिपक्वतेची चुणूक दाखविली आहे. आता त्यांच्याकडे पिंपरी-चिंचवडचे भविष्यातील उच्चशिक्षीत व प्रभावी नेतृत्व म्हणून पाहिले जाऊ लागले आहे.

मावळ लोकसभा मतदारसंघात शिवसेना शिंदे गट व महायुतीचे उमेदवार श्रीरंग बारणे आणि शिवसेना उद्धव ठाकरे गटाचे संजोग वाघेरे यांच्यात थेट लढत झाली. उद्धव ठाकरे यांना असलेल्या सहानुभूतीमुळे संजोग वाघेरे यांचा निवडणुकीत विजय होईल, असे अनुमान व्यक्त करण्यात येत होते. राजकीय निरीक्षक देखील वाघेरे यांचा विजय होण्यासारखे राजकीय वातावरण असल्याचे सांगत होते. मात्र या मतदारसंघात भाजपची असलेली मजबूत ताकद उद्धव ठाकरे यांच्या सहानुभूतीवर भारी ठरली आहे. विशेषतः पिंपरी-चिंचवड शहरातील “जगताप पॅटर्न”ने भाजपसाठी पर्यायाने महायुतीसाठी कमाल करून दाखविली आहे. “जगताप पॅटर्न”मुळे मावळ मतदारसंघात महायुतीच्या श्रीरंग बारणे यांचा विजय सुकर झाला आहे.

मावळ मतदारसंघात पिंपरी-चिंचवड शहरातील चिंचवड आणि पिंपरी या दोन विधानसभा मतदारसंघांचा समावेश होतो. या दोन्ही मतदारसंघात भाजपचे शहराध्यक्ष शंकर जगताप यांनी महायुतीचे उमेदवार श्रीरंग बारणे यांच्यासाठी जोरदार मोर्चेबांधणी करत प्रचार केला.  शंकर जगताप यांनी पिंपरी आणि चिंचवड मतदारसंघातील भाजपच्या प्रत्येक कार्यकर्त्याशी थेट संपर्क साधून प्रचार यंत्रणा राबविली. नियोजन आणि प्रचारासाठी स्वतः या दोन्ही विधानसभा मतदारसंघात कोपरा न् कोपरा पिंजून काढला होता. त्यासोबतच कोपरा व जाहीर सभांबरोबरच भाजपचे पदाधिकारी, कार्यकर्ते, सुपर वॉरियर्स, शक्तीकेंद्र प्रमुख, बुथप्रमुख यांना सोबत घेऊन १०० हून अधिक नमो संवाद सभा घेतल्या.

प्रत्यक्ष मतदानाच्या दिवशी पिंपरी आणि चिंचवड या दोन्ही विधानसभा मतदारसंघातील मतदान केंद्रावर शिवसेनेऐवजी भाजपचेच बुथ होते. म्हणजेच उमेदवार श्रीरंग बारणे यांच्या पक्षाचे बुथ नव्हते. मात्र भाजपने प्रत्येक मतदान केंद्रावर बुथ लावून नागरिकांकडून मतदान करून घेतले. शंकर जगताप यांच्या नियोजन आणि संघटन कौशल्याचा परिणाम म्हणजे मावळमध्ये महायुतीचे श्रीरंग बारणे यांचा विजय झालेला दिसत आहे.

दरम्यान, चिंचवड विधानसभा मतदारसंघाचे आमदार लक्ष्मणभाऊ जगताप यांचे निधन झाल्यानंतर या जागेवर गेल्या वर्षी पोटनिवडणूक झाली. या पोटनिवडणुकीत भाजप विरोधी वातावरण होते. मात्र त्यावेळी शहराध्यक्षपदावर नसलेल्या शंकर जगताप यांनी योग्य मोर्चेबांधणी करत पोटनिवडणुकीत भाजपला विजय मिळवून दिला होता. त्यांच्या या कामगिरीमुळेच त्यांना भाजपचे शहराध्यपद देण्यात आले. या पदावर काम करताना आता त्यांनी मावळ लोकसभा मतदारसंघात महायुतीच्या विजयासाठी जिवाचे रान केले. त्याचे महायुतीच्या श्रीरंग बारणे यांच्या विजयात रुपांतर झाले आहे. हा विजय फक्त भाजपामुळे आणि शंकर जगताप यांनी पायाला भिंगरी लावून केलेल्या कामामुळे मिळाल्याचे स्पष्ट आहे. त्यामुळे शहराच्या राजकारणात शंकर जगताप यांच्याकडे आता “किंगमेकर” म्हणून पाहिले जाऊ लागले आहे. पिंपरी-चिंचवड शहराचे भविष्यातील उच्चशिक्षीत व प्रभावी नेतृत्व म्हणून सर्वांच्या नजरा त्यांच्याकडे लागल्या आहेत.