भोसरी मतदारसंघात नुरा कुस्ती; शिवसेना उद्धव ठाकरे गटाच्या शिवसैनिकांचा काम न करण्याचा निर्धार

पिंपरी-चिंचवडमधील तीन विधानसभा मतदारसंघात महायुतीचे उमेदवार जाहीर झाले आहेत. मात्र महाविकास आघाडीच्या जागा वाटपाचे गुऱ्हाळ संपता संपत नसल्याने शिवसेना उद्धव ठाकरे गट, राष्ट्रवादी शरद पवार गट आणि काँग्रेसच्या कार्यकर्त्यांमध्ये अस्वस्थता आहे. महाविकास आघाडीच्या जागा वाटपात पिंपरी, भोसरी आणि चिंचवड या तीन विधानसभा मतदारसंघांपैकी चिंचवड आणि पिंपरी विधानसभा मतदारसंघ राष्ट्रवादी काँग्रेस शरद पवार गट आणि भोसरी विधानसभा मतदारसंघ शिवसेना उद्धव ठाकरे गट लढविणार असल्याचे पूर्वीपासून मानले जात आहे. निवडून येण्याचा निकष हा महाविकास आघाडीच्या जागा वाटपाचा फॉर्म्युला असेल, तर चिंचवड, पिंपरीत शरद पवार गट आणि भोसरीत उद्धव ठाकरे गट प्रबळ आहे. त्यासाठी या तीनही मतदारसंघात तशी राजकीय परिस्थिती आहे.

पिंपरी विधानसभा मतदारसंघात राष्ट्रवादी काँग्रेस शरद पवार गट, तर भोसरी विधानसभा मतदारसंघात शिवसेना उद्धव ठाकरे गटाचे उमेदवार निश्चित आहेत. केवळ चिंचवड विधानसभा मतदारसंघात राष्ट्रवादी शरद पवार गटाची उमेदवारी राहुल कलाटे की नाना काटे यांना द्यायची यावरून वरिष्ठ पातळीवर चर्चा सुरू असल्याचे सांगितले जात होते. मात्र आता त्यामध्ये बदल होत असल्याचे चित्र समोर येत आहे. पिंपरी विधानसभा मतदारसंघ शिवसेना उद्धव ठाकरे गटाला आणि चिंचवड व भोसरी विधानसभा मतदारसंघ राष्ट्रवादी शरद पवार गटाला देण्याबाबत चर्चा सुरू असल्याचे समोर आले आहे.

ही बाब भोसरी विधानसभा मतदारसंघातील शिवसैनिकांना समजल्यानंतर शिवसेना उद्धव ठाकरे गटात प्रचंड अस्वस्थता पसरली आहे. हा मतदारसंघ हमखास जिंकण्याची शक्यता असताना अचानक वरिष्ठांनी “यु-टर्न” घेतल्यामुळे शिवसैनिकांमध्ये संतापाची लाट पसरली आहे. महाविकास आघाडीच्या जागा वाटपात भोसरी मतदारसंघ राष्ट्रवादी काँग्रेस शरद पवार गटाला दिली जाणार असेल तर काम न करण्याचा निर्धार शिवसैनिकांनी केला आहे. हा मतदारसंघ शरद पवार गटाने लढविणे म्हणजे महायुतीसोबत नुरा कुस्ती करण्यासारखे आहे. नुरा कुस्तीच होणार असेल, तर काम करून काय फायदा, अशी भावना शिवसैनिकांमध्ये तयार झाली आहे.

नुरा कुस्ती म्हणजे भोसरी मतदारसंघात महायुती आणि महाविकास आघाडीत केवळ लढण्याचे नाटक होणार आहे. या कुस्तीतून मतदारांना मूर्ख बनवण्यासाठी लढण्याचे नाटक केले जाणार आहे. त्यात शिवसैनिकांचा केवळ वापर होणार होईल. या मतदारसंघात महायुतीचा विजय व्हावा यासाठीच भोसरी राष्ट्रवादी काँग्रेस शरद पवार गटाला दिली जात असल्याची शंका शिवसैनिकांना वाटू लागली आहे. त्यामुळे आता महाविकास आघाडीचे जागा वाटप जाहीर झाल्यानंतर शिवसैनिकांच्या नाराजीचा फटका कसा बसतो हे पाहणे महत्त्वाचे ठरणार आहे.