बॅनर न्यूज
पिंपरी विधानसभा मतदारसंघात राष्ट्रवादीच्या दोन गटातच होणार टक्कर; भाजप असेल निर्णायक भूमिकेत, मतदारसंघात हे आहेत इच्छुक…
पिंपरी : लोकसभेनंतर आता विधानसभा निवडणूक होणार आहे. पिंपरी-चिंचवडमध्ये तीन विधानसभा मतदारसंघ आहेत. तीनही मतदारसंघात भाजप आणि राष्ट्रवादीच्या दोन्ही गटाची ताकद आहे. त्यामुळे विधानसभेला शहरात भाजप विरूद्ध राष्ट्रवादी शरद पवार गट असाच सामना रंगण्याची शक्यता आहे. तीनपैकी पिंपरी विधानसभा मतदारसंघात सध्या राष्ट्रवादीच्या अजित पवार गटाचे अण्णा बनसोडे हे आमदार आहेत. येत्या विधानसभा निवडणुकीत अण्णा बनसोडे यांच्या विरोधात राष्ट्रवादी शरद पवार गटाच्या माजी नगरसेविका सुलक्षणा शिलवंत-धर या प्रबळ उमेदवार म्हणून पुढे येऊ शकतात. याशिवाय भाजपकडून अमित गोरखे, शिवसेना उद्धव ठाकरे गटाकडून माजी आमदार गौतम चाबुकस्वार, आरपीआयच्या नेत्या चंद्रकांता सोनकांबळे, वंचित बहुजन आघाडीकडून नवीन युवा चेहरा म्हणून महेंद्र सरवदे तसेच माजी नगरसेविका सीमा सावळे यांची नावे चर्चेत आहेत.
ऐन मे महिन्याच्या कडक उन्हात लोकसभा निवडणुकीचा धुरळा उडाला. ४ जून रोजी निवडणुकीचा निकाल लागला. आता या निकालाच्या आधारे राजकीय आडाखे बांधत सर्वच राजकीय पक्षांनी विधानसभा निवडणुकीची तयारी सुरू केली आहे. येत्या सप्टेंबरच्या अखेरीस किंवा ऑक्टोबर महिन्याच्या सुरूवातीला विधानसभा निवडणूक होणार आहे. ही निवडणूक अवघ्या दोन-अडीच महिन्यावर येऊन ठेपलेली आहे. त्यामुळे पिंपरी-चिंचवडमध्येही विधानसभेसाठी राजकीय पक्षांच्या मोर्चेबांधणीला वेग येणार आहे. शहरात तीन विधानसभा मतदारसंघ आहेत. या तीनही मतदारसंघात विजय मिळविण्याचा सर्वच राजकीय पक्षांचा प्रयत्न असणार आहे.
शहरातील तीनपैकी पिंपरी हा विधानसभा मतदारसंघ अनुसूचित जातीसाठी (एससी) राखीव आहे. या मतदारसंघात २००९, २०१४ आणि २०१९ अशा आतापर्यंत तीनवेळा झालेल्या निवडणुका अटीतटीच्या झालेल्या आहेत. जय आणि पराजयाचे अंतर अगदी कमी मतांचे राहिलेले आहे. आगामी निवडणुकीसाठी या मतदारसंघात इच्छुकांची अनेक इच्छुकांची नावे चर्चेत आहेत. राष्ट्रवादीच्या अजित पवार गटाचे अण्णा बनसोडे हे या मतदारसंघाचे विद्यमान आमदार आहेत. ते या मतदारसंघात दोनवेळा निवडून आलेले आहेत. २०१४ मध्ये शिवसेनेच्या गौतम चाबुकस्वार यांच्याकडून त्यांचा पराभव झाला होता. आता चौथ्यांदा ते या मतदारसंघात निवडणूक लढण्यास सज्ज आहेत. फक्त ते राष्ट्रवादीच्या अजित पवार गटाकडूनच निवडणूक लढणार की अन्य कोणत्या राजकीय पक्षाचा आसरा घेतात याबाबत शहराच्या राजकारणात राजकीय संभ्रम आहे.
अण्णा बनसोडे हे विद्यमान आमदार असल्याने ते या मतदारसंघातील प्रबळ उमेदवार मानले जातात. त्यांना टक्कर देण्यासाठी राष्ट्रवादीच्या शरद पवार गटाच्या माजी नगरसेविका सुलक्षणा शिलवंत-धर यांचे नाव तोडीच्या उमेदवार म्हणून चर्चेत आहे. गेल्यावेळी राष्ट्रवादीने सुलक्षणा शिलवंत-धर यांना आधी आणि नंतर अण्णा बनसोडे यांना उमेदवारी दिली होती. उमेदवारी अर्ज दाखल करताना अण्णा बनसोडे यांनी आधी अर्ज भरला म्हणून ते वाचले. अन्यथा पिंपरीच्या आमदाराचे नाव वेगळेच असते. आता राष्ट्रवादीत दोन गट निर्माण झाल्याने सुलक्षणा शिलवंत-धर यांचा मार्ग मोकळा झाला आहे. त्या शरद पवार गटाकडून निवडणूक लढणार हे जवळपास निश्चित आहे.
याशिवाय भाजपकडून अमित गोरखे यांचे नाव आघाडीवर आहे. ते पिंपरी मतदारसंघात कायम संपर्क ठेवून आहेत. मात्र हा मतदारसंघ महायुतीच्या जागा वाटपात भाजपला मिळणे मुश्किल वाटत असल्याने गोरखे यांचा हिरमोड होण्याची शक्यता आहे. त्याचप्रमाणे रिपब्लिकन पार्टी ऑफ इंडियाच्या (आठवले गट) चंद्रकांता सोनकांबळे यांचेही नाव आमदारकीच्या स्पर्धेत आहे. २०१४ च्या निवडणुकीत सोनकांबळे यांनी या मतदारसंघात कडवी टक्कर दिली होती. मात्र त्यांचा पराभव झाला होता. आताही त्यांचे नाव चर्चेत आहे. याशिवाय वंचित बहुजन आघाडीकडून शहर उपाध्यक्ष महेंद्र सरवदे यांचेही नाव पिंपरी मतदारसंघात चर्चेत आहे. प्रस्थापितांना थेट भिडण्याची ताकद, लोकांच्या मदतीला धावून जाण्याचा स्वभाव, चांगले संवाद कौशल्य आणि उत्तम जनसंपर्क असल्याने वंचित बहुनज आघाडी यंदा पिंपरी मतदारसंघात महेंद्र सरवदे यांना संधी देण्याची शक्यता आहे. प्रत्येकवेळी प्रस्थापितांच्या मागे धावणाऱ्या पिंपरी-चिंचवड वंचित बहुजन आघाडीने यंदा आपल्याच कार्यकर्त्याला संधी न दिल्यास पक्षाची मते दुरावण्याची शक्यता आहे. त्यामुळे या पक्षाकडून महेंद्र सरवदे यांचे नाव या मतदारसंघातून पुढे येत आहे.
त्याचप्रमाणे भाजपच्या माजी नगरसेविका सीमा सावळे यांचेही नाव पिंपरी मतदारसंघात चर्चेत आहे. मात्र राजकारणाचा वापर करत पैसे कमवून पळून जाण्याचा त्यांचा स्वभाव असल्यामुळे कोणत्याच राजकीय पक्षाचा त्यांच्यावर विश्वास राहिलेला नाही. २०१९ च्या विधानसभा निवडणुकीत सीमा सावळे यांनी अमरावती जिल्ह्यातील दर्यापूर मतदारसंघातून अपक्ष निवडणूक लढविली होती. तेथे त्यांचे अक्षरशः डिपॉझिट जप्त झाले होते. त्यामुळे डिपॉझिट जप्त झालेल्या आणि लोकांचा वापर करून पैसे मिळाले की पळून जाणाऱ्या उमेदवार म्हणून त्यांची शहराच्या राजकारणात ख्याती निर्माण झालेली आहे. सीमा सावळे यांचे दाखवायचे दात आणि खायचे दात कसे वेगवेगळे आहेत हे शहरातील राजकीय पक्षांना आणि राजकारण्यांना चांगलेच माहिती असल्यामुळे त्या कोणत्या पक्षाकडून निवडणूक लढविणार हे पाहणे महत्त्वाचे ठरणार आहे.
